Jis. Ek dog eers iemand hou my vir die gek toe ek die raaksien. Maar, wil jy nou meer, die Stadsraad van die Italiaanse hoofstad, Rome, het Dinsdag aangekondig dat dit nou in die stad onwettig is om goudvisse in die tradisionel goudvis-bak aan te hou.
Die stadsraad sê in hulle verklaring dat die klassieke sferiese visbakke nou verban is deur ´n nuwe plaaslike regulasie. Hierdie regulasie het onder meer ook uitgestippel dat visse, en enige ander diere, nie as pryse in kompetisies weggegee mag word nie.
Die aankondiging volg die onlangse nuwe Italiaanse wetgewing wat tronkstraf as straf vir die nalatige alleenlating van honde en katte aanbied. Ne!
Ek het so bietjie gaan oplees en dit blyk die Italianers het ´n skielike diere-ontfermings fase wat die land slaan. In Turin, Noord-Italie, is daar in April ´n wet ingestel wat ´n honde-eienaar met tot 500 Euros kan beboet indien hulle nie man se beste vriend, tot drie keer per dag laat stap nie.
Dit is dalk ´n manier van dink wat ons plaaslik ook kan toepas. Kerstyd kom nader en ek ril as ek terugdink aan al die gruwelstories wat ons die laaste paar kersseisoene moes beleef oor wreedheid teenoor troeteldiere. (Storie deur Chris Rootman)
