Ek lees vanoggend in ‘n ou Readers Digest uitgawe oor Albert Einstein se lewe en dink toe dit sal interessant wees om nog meer oor hierdie prominente genie uit te vind… so by die kantoor aangekom gaan ek toe eers na Wikipedia, en daarna die Mieliestronk… Wel tussen daardie twee bladsye is oorgenoeg feite en “stories”, en webskakels oor Einstein om meeste oningeligtes te laat voel dat hulle diè Nobelpryswenner al lankal goed ken.
Het julle byvoorbeeld geweet dat hy ‘n sagte plekkie vir die skoner geslag gehad het? Ja, daar was blykbaar ‘n hele rits vroue in Mnr. Einstein se lewe! Die eerste groot liefde van sy lewe was seker Mileva Marić, wat saam met hom in Switserland studeer het, en toe later Mevrou Einstein geword het. Sommige mense spekuleer ook dat sy moontlik gehelp het met sommige van sy groot bevindings en selfs die bekende relatiwiteitsteorie. Hulle huwelik het egter nie uitgewerk nie, en na hul paaie geskei het, het hy nog vele verhoudings aangeknoop. Kort voor die groot oorlog in Europa uitgebreek het, is Albert Einstein toe na die Verenigde State, aangesien hy as Jood vir sy lewe gevrees het.
In die VSA het hy toe in ‘n brief aan president Rooseveldt geskryf, waarin hy hom waarsku oor die gevaar van kernwapens wat die Duitsers besig was om te ontwikkel, en gevolglik het Amerika toe self ‘n kernbom gebou en Japan daarmee aangeval… en die res is geskiedenis!
Wel hier is die Wikipedia bladsy:
http://en.wikipedia.org/wiki/Albert_Einstein
Die Afrikaanse taakhulp is hier:
http://www.mieliestronk.com/einstein.html
