Kuier Saam in Afrikaans

Afrikaans sprekendes van regoor die wereld gaan hulle oujaar uittel op die baie gewilde Afrikaanse Internet Radiostasie, Uitsaaines Live!

Die bestuurder van hierdie radio stasie, Raymond Greenberg, sê dat hulle omroepers wat uit verskillende wêrelddele uitsaai, gereed staan om elke tydsone se luisteraars te akkommodeer deur lewendig hulle aftelling na nuwejaar uit te saai. Dit kom basies daarop neer dat luisteraars, soos wat hulle nuwejaar aanbreek in hulle tydsone, na die ateljee kan deurbel en lewendig op die lug hulle aanbreek van die nuwejaar af te tel en te vier. Luisteraars in 13 Tydsones het reeds aangedui dat hulle beslis gaan deelneem aan hierdie wonderlike geleentheid om hulle nuwejaar te deel met ander luisteraars waar nuwejaar nog moet aanbreek, of waar nuwejaar reeds aangebreek het.

Die 13 Tydsones huidiglik van toepassing in die volgorde waarop nuwejaar vir elk gaan aanbreek is as volg:

1. New Zealand
2. Oos Australie
3. Wes Australie en Japan
4. Taiwan
5. United Arab Emirates
6. Saudi Arabia
7. Portugal, Engeland, Ierland
8. Duitsland, Griekeland, Belgie, Nederland, Spanje, Frankryk
9. Suid Afrika
10. V.S.A Ooskus gebiede
11. V.S.A Oostelike Sentrale gebiede
12. V.S.A Westelike Sentrale Gebiede
13. V.S.A Weskus en Kanada.

Raymond se dat hierdie inisiatief ontstaan het in Japan met Jaques van Rooyen wat tans daar diens doen as ´n omroeper. Hierdie inisiatief word beskou as ´n eerste ter wereld wat radio uitsending betref, want nog nooit voorheen is dit op enige radiostasie vermag om ´n aanbreek van nuwejaar lewendig vanuit soveel verskillende plekke uit te saai nie. Effektief beteken dit dat nuwejaar op Uitsaaines Live, omtrent 24 uur lank, amper elke uur of twee gaan aanbreek. Die moontlikheid bestaan ook dat die 13 Tydsones dalk nog kan vermeerder soos wat luisteraars besluit om deel te neem, aangesien Uitsaaines luisteraars het wat getrou inskakel, vanuit alle denkbare wêrelddele. Afrikaans, as taal, was nog nooit voorheen so goed verteenwoordig oral ter wereld, met soveel luisteraars wat op een plek, elke dag bymekaarkom, om na Uitsaaines Live te luister nie.

Belangstellendes wat wil inskakel om na hierdie gewilde Afrikaanse internet radiostasie te luister, kan gerus ´n draai gaan maak by www.uitsaaines.co.za. Dit is ´n gratis diens, wat vrywillig onderhou word deur die bestuur en omroepers daarvan.

Sluit in September aan by die wêreld se beste skerpskertsers en geniet ‘n jolige tydjie by die Cape Town International Comedy Festival – Suid-Afrika se voorste komediefees wat vanjaar sy elfde bestaansjaar in die Moederstad vier.

Met sewe aparte programme om uit te kies, bied die fees vanjaar iets wat in elkeen se smaak sal val – of jy nou hou van komedie op ‘n verhoog, op ´n skerm of selfs op straat! Die skerpskertsers wat vanjaar deelneem kom van Britanje, die VSA, Kanada, Duitsland en Australië en by hulle sluit Suid-Afrika se beste nuwe komedie-sterre aan, insluitend David Newton, Riaad Moosa, Nik Rabinowitz, Dowwe Dolla, Michael Naicker en die gewilde duo van Joe Barber-faam, Oscar Petersen en David Isaacs.

Soos in die verlede gaan die fees se staatmakers, naamlik die Main Arena en die Danger Zone, by die Baxter plaasvind, terwyl ´n opwindende nuwe program met die beste plaaslike Afrikaanse komedie – Bek-Lash – sy debuut by die Kunstekaap Teater maak.

Bek-Lash gooi die talente van Tobie Cronje, Dowwe Dolla, Joey Rasdien, Marion Holm, Martin Jonas, Emo Adams en die Joe Barber-duo saam met diè van Steve Best, ´n gewilde Britse skerpskertser bekend vir sy fisiese komedie. Met die bekroonde Lara Bye as regisseur neem Bek-Lash die formaat van ´n tipe vaudeville- of kabaretvertoning aan met die gewilde musikale komediant Pedro Kruger as gasheer.

Die Main Arena-program van skerpskertsers het die bekende Britse komediant Alistair Barrie as gasheer. Hy gaan Kaapse gehore bekendstel aan die Australianer Carl Barron, die Kanadees Laurie Elliott en die Amerikaner Tom Clark. Saam met hulle op die program is Suid-Afrika se voorste skerpskertsers Nik Rabinowitz, David Newton en Riaad Moosa.

Een van die jarelange groot gunstelinge op die fees, die Danger Zone, bied komedie vir meer avontuurlustige gehore wat van ´n meer gewaagde benadering tot humor hou. Op vanjaar se program is die Australianer Jim Jefferies wat in Britanje gebaseer is en beskou word as een van die beste opkomende komedie-sterre. Hy het aan die 2005 Cape Town International Comedy Festival deelgeneem. Saam met Jefferies tree sy mede-Australianer Steve Hughes op sowel as die Amerikaner Bert Kreischer en die Kanadees Terry Clement. Die Danger Zone-program behels ook die Suid-Afrikaner Kevin Perkins en sy alter ego, Michael Naicker, wat dwarsoor Suid-Afrika bekend is as die op-die-man-af “superheld van die man op straat”.

Die veteraan organiseerder van die fees, Sam Hendrikse, is in sy noppies met die verskeidenheid komiese talent wat by vanjaar se fees aangebied word. “Ons het werklik iets vir almal – van die nar-agtige koddighede van die straatkomediante wat kinders en grootmense gaan amuseer, tot die meer gesofistikeerde humor van die top internasionale skerpskertsers wat deel is van die Main Arena en Danger Zone-programme. Ons is ook opgewonde om die eerste Afrikaanse verhoog by die fees aan te bied met ons plaaslike komediante in die Bek-Lash-program,” sê Hendrikse.

Nog ´n nuwigheid op vanjaar se program is die insluiting van ´n mini filmfees, Comedy Shorts, wat die wêreld se beste komiese kort films by die Labia Teater gaan vertoon. Dit word in samewerking met Just For Laughs, die grootste komediefees in Kanada, aangebied en bestaan uit twee programme, naamlik Funny Shorts en Filthy Shorts. Net soos met die Main Arena-program bied Funny Shorts die beste hoofstroom kort films op vanjaar se Just For Laughs-program, terwyl Filthy Shorts bestaan uit ´n verskeidenheid kort films met alternatiewe humor deur van die wêreld se gekste filmmakers. “Laasgenoemde films is nie vir die preutses bedoel nie en hulle gewaagdheid sal eerder groter aanklank vind by die Danger Zone-gehore,” verduidelik Hendrikse.

“Soos wat die Cape Town Comedy Festival internasionale opgang maak, is dit van selfsprekend dat samewerking met ander internasionale komediefeeste begin posvat en ons is baie opgewonde om die Comedy Shorts-program saam met Montreal se Just For Laughs-fees aan te bied.”

Vanjaar se fees bied weereens ´n aantal rare straatkomediante wat niksvermoedende Kapenaars gaan vermaak as deel van die Street Comedy Festival, wat die ongelooflike komiese talente van die straatkunstenaars van stede dwarsoor die wêreld gaan vertoon.

Gehore wat belangstel in ´n voorsmakie van die gewildste optredes by al die vertonings sal dit kan kry àf Woensdagaande by The Late Show by die Bang Bang Club àf by die Best of the Fest wat Sondagaande gedurende die fees by die Baxter Teater aangebied word.

Die Main Arena-program by die Baxter Teater duur van 3 tot 22 September, die riskante Danger Zone-program by die Baxter-konsertsaal duur van 10 tot 22 September en Bek-Lash is by die Kunstekaap Teater van 4 tot 22 September. Die Comedy Shorts filmfees is aan by die Labia Teater van 3 tot 22 September. Besoek www.comedyfestival.co.za vir ´n program van al die verskillende vertonings en ´n volledige lys van die sensasionele internasionale en plaaslike skerpskertsers. Bespreek by Computicket.

Een van ons lesers het die volgende boodskap deurgestuur, en ons het gedink dat julle inderdaad sal belangstel om te weet dat die Wêreldwye Web nou in al sy/haar glorie, amptelik in Afrikaans deurkruis kan word!

"Haai Gerhard / wie ookal hierdie kry.

Groete
Friedel"

Besoek dus gerus die amptelike aflaaiblad hier en kry jou gratis kopie vandag nog:

*Let daarop dat die lêer ongeveer 6 MegaGrepe groot is, en indien jy nog met ‘n telefoonverbinding sit vir Internet kan dit dalk ‘n tydjie neem om af te trek…

http://www.mozilla.com/en-US/firefox/all.html

Afrikaans, Web, Firefox, beskikbaar