Kuier Saam in Afrikaans

Hoe gemaak wanneer mense so kliphard oor die telefoon met jou praat dat jy die gehoorstuk so op ‘n afstand moet hou, en nog altyd elke woord duidelik kan hoor? Wat ek in so ‘n geval doen is om die deel waar mens luister weg van my oor te hou maar dan self lekker hard en direk in die mondstuk in te praat! Ongelukkig het daardie taktiek van my tot dusver nog nie enige sukses getoon nie Dus, as enige van ons lesers goeie voorstelle het oor hoe om die probleem te hanteer sal ek baie graag daarvan wil hoor, aangesien ek gereeld met sulke mense moet praat oor die foon!

So gepraat van mense wat te HARD PRAAT… daar is seker min dinge wat so irriterend is as wanneer jy ‘n goeie fliek in die teater geniet en daar sit ‘n paar mense wat opsluit net heeltyd moet klets… en die ergste is dat hulle dan ook gewoonlik salig onbewus is van hoe hard hul gesprek is! Ek het op hierdie webblad afgekom, waar iemand die voorstel gemaak het dat ‘n LED liggie aan die agterkant van die sitplekke in ‘n teater aangebring word, wat dan gekoppel word met ‘n klankapparaat wat meet hoe hard daar in daardie spesifieke ruimte gepraat word, en as die “geraas-vlak” te hoog is gaan die liggie aan!

Ek dink hulle moet sommer ‘n lekker harde klokkie ook daaraan koppel en direk in die oortreder se oor laat lui!!!

http://www.halfbakery.com/idea/you_27re_20talking_20too_20loud…

kliphard, praat, telefoon, luister

Net gister het ek en ‘n paar vriende gesels oor die feit dat dit amper onmoontlik deesdae is om ‘n huis te bekostig. As jy gelukkig is kan jy ‘n “hokkie” op die sesde vloer iewers aanskaf teen ‘n belaglike prys…

Baie van hierdie woon eenhede het nie eers balkonne nie, net vensters, maar jy kan natuurlik nie die maksimum hoeveelheid son so kry nie en as jy soos ek is, het jy daardie son nodig

Vandag se webwerf bevat ‘n oplossing vir hierdie probleem. Dit lyk net soos ‘n venster, maar dit kan uit vou om ‘n balkon te raak en volgens die foto’s is dit groot genoeg dat jy ‘n stoel en klein tafeltjie daar kan inpas.

Al wat my bekommer is hoe sterk hy gaan wees oor die langtermyn, maar ek hou nogal van die idee

http://www.notcot.com/archives/2007/02/bloomframe.php

woonstel, venster, balkon, uit vou

Hoe oorleef mens daardie kere wanneer jy alleen saam met een ander persoon in ‘n hysbak (of ander klein spasie) beland en die minute… nee, selfs die sekondes wat verbygaan voel soos ‘n ewigheid… want nie een van julle weet wat om te sê of waar om te kyk nie. Jy wil nie direk na die ander persoon kyk nie, want dalk dink hy/sy jy is onbeskof en “staar” na hom/haar, en jy wil ook nie eintlik ‘n gesprek begin nie want dit kan lyk asof jy verwaant en voor-op-die-wa is! In elk geval – waaroor praat mens in ‘n hysbak? So hoe gemaak?

Soms wens jy weer dat die ander persoon tog net vir ‘n oomblik wil stilbly, want ja, daar is snaakse karakters in die wêreld van ons en party mense begin amper histeries te praat wanneer hulle in sulke ongemaklike situasies beland… en dalk is jy vandag die “gelukkige” persoon wat moet luister hoe die ou tannie se doktersondersoek afgeloop het, of hoedat haar dogter met hierdie wonderlike ou van Londen begin uitgaan het, maar toe vind sy uit dat hy eintlik getroud is en moeg geraak het vir sy vervelige bestaan en nou gaan hy Hong Kong toe en haar dogter se hart is gebreek, want daar’s skielik ook nie meer plek vir haar in sy lewe nie…

Dalk is jou “mede-passasier” ‘n asemrowende mooi jong dame in ‘n skramse rokkie en jy weet regtig nie waar om te kyk nie

Watter soort geboue (hospitale, groot maatskappye, ens) se hysbakke dink julle sorg vir die a) mees interessante ritte, b) die mees ongemaklikes, en c) die absoluut verveligstes?

Behalwe vir die gewone “stilte-vrees” wat baie van ons het, is daar ook nog die veiligheidsaspek om in ag te neem. Veral in ons land. As jy ‘n vrou of jong meisie is sal jy waarskynlik baie skrikkerig wees om alleen in ‘n hysbak saam met ‘n vreemde man te klim…

Hier is so ‘n paar handige “reëls” om toe te pas tydens ‘n hysbakrit:

http://bandtcrowd.blogspot.com/2006/02/elevator-rules…

As dit nog steeds vir jou te ongemaklik laat voel, probeer dan hierdie taktieke om dinge meer “interessant” te maak

http://www.listology.com/content_show.cfm/content_id.16981/Humor

oorleef, hysbak, ewigheid, alleen

Wanneer dit kom by groot dinge soos om van werk te verander, is dit natuurlik altyd belangrik om die beste voet voor te sit en die beste moontlike indruk te maak op jou toekomstige baas.

Die CV (Curriculum Vitae) is natuurlik die beste metode om dit mee te doen. Om die waarheid te sê, die CV kan jou kanse om die werk te kry maak of breuk.

Vandag se webwerf het stappe om te verseker dat jy die beste uit die spasie kry wat op jou CV is.

Hierdie was nogal ‘n interresante lees vir my ook.

http://www.randsinrepose.com/archives/2007…

CV, curriculum vitae, werk, aansoek

So ‘n week of wat terug het ek geskryf oor reuke – goed en sleg… wel vandag het ek ‘n interessante webblad gekry wat handel oor geraas! Wat dit effens ongewoon maak is die feit dat hulle gaan kyk het watter tipes geraas beskou meeste mense as die heel ergste, afstootlikste geluide op aarde… die wat werklik deur murg en been sny… Wel ek sou beslis “vingernaels wat op ‘n swartbord geskraap word” daar byvoeg! Dalk ook so ‘n paar name van mense wat nie in die openbaar behoort te sing nie… maar wag laat ek dit liewer los

Nog iets wat ek onlangs gelees het is dat te min geraas ook nadelig kan wees vir mens se gehoorontwikkeling: Ja daar is bewyse gevind dat mense wat in stil plattelandse areas woon en nie aan die daaglikse lawaai van ‘n stadslewe blootgestel word nie se gehoor nie so goed ontwikkel is nie. So nee, jou ma het nie nonsens gepraat toe sy gesê het daardie klipharde musiek gaan jou doof maak nie, maar dis ook nie ‘n goeie idee om jou lewe in stilte deur te gaan nie

http://www.theage.com.au/articles/2007/01/24/1169594363113.html

geraas, ergste, geluide, stilte

Vandag se Teetyd Pret se naam is “Championship Rally” en soos jy kan aflei uit die naam, is dit ‘n motor wedren speletjie.

Wat hierdie een aanders maak as ander wedren speletjies is die kwaliteit van die speletjie se beheer en die grafieka. (Dit voel soos ‘n Playstation 1 speletjie)

Om die motor in die speletjie te beheer is ook lekker eenvoudig. Jy gebruik die pyltjies om te bestuur en vorentoe te beweeg. En die spasie balk om die handrem te gebruik.

Geniet hom, ek week ek gaan

http://www.miniclip.com/games/championship…

speletjie, teetyd, ontspan, afrikaans

Wat het hierdie week op Kuier.co.za gebeur? Hier is jou kans om in te haal, in Afrikaans!

Wilde Motor Ongelukke – Ongelukke is ´n redelike alledaagse ding op paaie reg rondom die wêreld. Die mees algemeene ongeluk is seker die kleintjies waar iemand skielik…

Inspirasie Vir Die Week – Dis alweer Maandag, en as ek so rondom my kyk dan lyk dit asof meeste mense nie juis lus het vir al die probleme wat die nuwe week mag inhou nie…

Bok van Blerk Nuus – Dit lyk asof Bok van Blerk besig is om die Afrikaanse musiek met ´n storm te oor te vat… Wat snaaks is dat hy op een of ander manier…

Kleiner Is Definitief Beter – As daar nou iets is wat my onlangs baie beà?ndruk het is dit die Flybook skootrekenaar, wat klein genoeg is om inderdaad op mens se skoot te pas…

Borrels vir jou Hond – Dit is maar ´n honde lewe, kinders het altyd meer pret met die beter speelgoed. Hulle kan selfs borrels blaas terwyl honde net met ´n bal of ´n stok kan speel…

En Die Bod Word Toegeslaan – Sal jy so ver gaan om jou lewe aanlyn te verkoop? Dit is presies wat ´n Australiese branderplankryer onlangs gedoen het, net nadat sy meisie hom gelos het. Blykbaar kan hy nie rêrig enige redes gee vir…

Titan, Ons Huis van die Toekoms? – Wetenskaplikes van reg rondom die wêreld soek op die oomblik na ´n ander “Aarde” in die eindelose heelal…

Kook Met Sonkrag – Dit mag miskien vir ander mense lyk asof jy nie meer al jou varkies op hok het nie… of besig is om met jou familie op Titan te probeer kommunikeer, maar ek dink hierdie manier waarop die son benut kan word…

Klets Kamer Pret – As jy een van die mense wat daarvan hou om aanlyn te klets. Misjien het jy, soos ek, dit so ´n paar jaar gelede gedoen en het nog lekker herinneringe…

Sowaar? Regtig? Kan Dit Wees? – Party mense sal ook enige iets glo! Ja hierdie storie is weereens te danke aan ´n Australiër en is ironies genoeg die gevolg van ´n kunstenaar se poging om met medisynemaatskappye se slim advertensietaktieke te spot en juis…

Geniet die naweek!

afrikaans, afrikaanse musiek, kuier, suid afrika

Party mense sal ook enige iets glo! Ja hierdie storie is weereens te danke aan ‘n Australiër en is ironies genoeg die gevolg van ‘n kunstenaar se poging om met medisynemaatskappye se slim advertensietaktieke te spot en juis te wys hoe maklik hulle mense oorreed om medisyne te koop… Justine Cooper kry toe die idee om ‘n “siekte” op te maak en loods ‘n hele bemarkingsveldtog om ‘n (ook fiktiewe) middel daarvoor bekend te stel!

Die hele ding is so goed beplan dat baie mense daarvan oortuig is “Dysphoric Social Attention Consumption Deficit Anxiety Disorder (DSACDAD)” bestaan wel en dat hulle “Havidol” kan gebruik om dit te behandel… Nogal ‘n mondvol nè

http://www.iol.co.za/index.php?newslett=1&click_id…

Hoekom is dit dat meeste mense so maklik byna enige iets sal glo? Kyk maar net na die hoeveelheid van daardie “aanstuur-eposse” waarin jy vertel word hoedat die maatskappy wat die produkte bemark op een of ander wonderbaarlike manier sal kan sien as jy die e-pos aan 20 mense stuur en dan sal jy kort daarna jou nuwe selfoon of motor of kis bier (of selfs ‘n klomp geld van Bill Gates af!) ontvang… ja ons gesonde verstand sê in meeste gevalle onmiddellik vir ons “moet nou nie dom wees nie – hierdie is beslis ‘n groot klomp nonsens”, maar nogtans word daardie gemorspos in hulle duisende aangestuur! Die resultaat: ‘n Stadiger Internet en sadistiese, breë glimlagte op die gesigte van die persone wat daardie ketting-pos begin het… Dis net jammer dat mense wat goedgelowig is en die beste in hul medemens wil sien so dikwels vir hul positiwiteit gestraf word!

Daar is wetenskaplike studies gedoen wat aandui dat mense makliker mislei kan word deur slim stories en bemarkingsfoefies as hulle kinderjare moeilik was. Persoonlik dink ek dit hang maar af van persoon tot persoon, want mens kan ook redeneer dat diè wat swaar gekry het as kinders juis nie maklik in sulke slaggate sal trap nie…

Hier is so ‘n bietjie tong-in-die-kies raad vir mense wat ondersteuning nodig het in die verband – ongelukkig is dit in Engels… jammer

http://www.computerjokes.net/184.htm

glo, oortuig, goedgelowig, mislei

Is jy een van die mense wat daarvan hou om aanlyn te klets. Misjien het jy, soos ek, dit so ‘n paar jaar gelede gedoen en het nog lekker herinneringe van “die goeie ou dae” toe die Internet nog jonk en relatief eenvoudig was.

Vandag se webwerf bevat die beste sê goed wat in kletskamers reg rondom die wêreld gesê is oor die laaste paar jare deur die gebruikers na hierdie webwerf opgelaai is. Dit is ‘n databasis vir die beste kletskamer gesprekke vir ten minste 10 jaar.

Persoonlik, verskaf hierdie webwerf nou al vir my vermaak vir ‘n goeie twee weke.

http://www.bash.org/

klets, kamer, gesels, wêreld

Dit mag miskien vir ander mense lyk asof jy nie meer al jou varkies op hok het nie… of besig is om met jou familie op Titan te probeer kommunikeer, maar ek dink hierdie manier waarop die son benut kan word om kos gaar te maak is iets wat ons tot groot voordeel kan gebruik! Die voordeel van ons gesondheid, omdat dit ‘n natuurlike manier van kook is, en ook tot die voordeel van ons planeet omdat die vrylik beskikbare, volop energie van die Son gebruik word in plaas daarvan dat ander waardevolle bronne in die natuur verder opgebruik word. Wie weet, dalk het ons dan nie eers nodig om ‘n lang vlug na Titan te onderneem nie

Lees gerus op hierdie webwerf presies hoe om ‘n Sonkrag-oond te bou en volgende keer as Eskom net genoeg elektrisiteit kan verskaf om Zimbabwe aan die gang te hou, kan jy lekker ontspan met ‘n heerlike warm aandete!

http://www.solarcooking.org/

Nog nie oortuig nie? Kyk dan gerus ook hier na al die heerlike maaltye wat met sulke son-oonde gemaak is – en ja, hulle het ook resepte:

http://www.cookwiththesun.com/solar.htm

son, energie, natuurlike, kook